Viðurkenningarráð Hagþenkis ákveður tilnefningar og velur þann sem hlýtur viðurkenninguna. Ráðið er skipað fimm félagsmönnum Hagþenkis af ólíkum fræðasviðum og hafa þeir fundað reglulega síðan í lok október.

Viðurkenning Hagþenkis telst til virtustu og veglegustu verðlauna sem fræðimönnum og höfundum fræðilegra rita fyrir skóla og almenning getur hlotnast. Veiting hennar hefur oft vakið athygli en sjaldan deilur. Öll fræðirit sem koma út á Íslandi koma til greina við veitingu viðurkenningarinnar óháð útgefanda eða tilnefningum.

Verðlaunaupphæðin er nú 750.000,- kr sem er sama upphæð og Félag íslenskra bókaútgefenda veitir til íslensku bókmenntaverðlaunanna í hvorum flokki fyrir sig.

Í Viðurkenningarráði Hagþenkis fyrir árið 2007 eru: Allyson Macdonald menntunarfræðingur, Baldur Hafstað íslenskufræðingur, Karl Skírnisson náttúrufræðingur, Sesselja G. Magnúsdóttir dansfræðingur, Viðar Hreinsson bókmenntafræðingur