Mennta- og barnamálaráðuneyti kynnir til samráðs drög að frumvarpi til laga um námsgögn. Í drögum að frumvarpi, sem hér eru kynnt í opnu samráði, er lagt til að sett verði ný heildarlög um námsgögn.

Með frumvarpinu er lagt til að börn að 18 ára aldri muni, að loknu innleiðingatímabili, eiga rétt á gjaldfrjálsum námsgögnum í leik-, grunn- og framhaldsskóla. Lagt er til að einfalda starfrækslu námsgagnasjóðs en útvíkka hlutverk þróunarsjóðs námsgagna á þann hátt að heimilt verði að sækja um styrk til þýðinga á námsefni og að höfundar námsefnis fyrir tónlistarskóla geti sótt um í sjóðinn. Lagt er til að útfært verði leiðbeiningar- og fræðsluhlutverk þróunarsjóðs námsgagna með því að umsækjendur geti sótt sér faglegan stuðning við útgáfu og vinnslu þeirra verkefna er styrk hljóta. Þá er lagt til að unnin verði útgáfuáætlun námsgagna sem kveður á um áherslur í námsefnisgerð til fimm ára í senn. Með frumvarpinu er jafnframt lagt til að ráðherra verði veitt heimild til útgáfu gæðaviðmiða um gerð og útgáfu námsgagna.

Lengi hefur verið kallað eftir betra fyrirkomulagi við útgáfu námsgagna fyrir allt menntakerfið. Ábendingar og athugasemdir við núverandi fyrirkomulag hafa meðal annars komið fram við greiningu á stöðu námsgagna og í viðhorfskönnunum meðal kennara og skólastjórnenda í tengslum við stefnumótun um málefnið, og við undirbúning nýrrar þjónustustofnunnar á sviði menntamála, sbr. lög um Miðstöð menntunar og skólaþjónustu, nr. 91/2023. Frumvarpið byggir að hluta á vinnu starfshóps sem mennta- og barnamálaráðherra skipaði um endurskoðun laga um námsgögn.

Innsendar umsagnir (18)

Umsögn Hagþenkis https://www.althingi.is/altext/erindi/155/155-96.pdf

Hér eru allar umsagnir: https://www.althingi.is/thingstorf/thingmalin/erindi/155/222/?ltg=155&mnr=222